Atto Primo: Scena Quarta

(Entra Stefano. Ha un libro in mano e la radio sottobraccio, ai piedi un paio di pianelle marroni. Guarda furtivamente se c'è il padre e va a coricarsi sul divano. Accende la radio e si sintonizza su un programma di canzoni rock. Ascolta un po’ di musica ad alto volume, poi incomincia a leggere. Dopo un po’ entra la madre.)
NANNINA: (A bassa voce) Oi Stè!... (Più forte) Stè!... (Gridando) Oooooooh!
STEFANO: (Sobbalza dalla paura e abbassa il volume della radio.) Oi mà, n‘ata paura ‘e chesta e me vene nu collasso!
NANNINA: Comme sì delicato ‘e core, figlio mio!... (Con tono minaccioso) Dimane, appriess’ ô maio, nun te fà veré da pàteto a braccetto cu chella zoccolella!
STEFANO: (Arrabbiato) Primma cosa chella zoccolella nun è na zoccolella, ma è na brava guagliona!… Seconda cosa tene pure nu nomme! (Si alza, mette la radio sulla tavola e torna a sedersi sul divano.) Si chiama Stella!  E io ‘a voglio pure bene!
NANNINA: Ma tu ugualmente ce he ‘a stà1 nu chilometro luntano, pecché, si te vede pàteto, chillo te taglia ‘a capa ‘a copp’ â noce dô cuollo2. Te fa allicurdà Natale!
STEFANO: (Scatta dal divano come una saetta.) Ma io vulesse pròpio sapé pecché nun ve piace!... Che tene chesta guagliona?!?
NANNINA: (Categorica) Nu nce piace!... Nu nce piace… e basta!... E’ chiaro? O ce vò  na martellata pe tô fà trasì ncapa?
STEFANO: ‘O vi’3, chesto saje dìcere! (Scimmiottando la madre) “Nu nce piace...  e basta!... E' chiaro?”  Ma dimmi almeno  una  ragione  valida. Una sola!  “E’ brutta!... Tene ‘e cosce storte!”...
NANNINA: (Interrompendolo) E chesto ‘o saje tu!
STEFANO: ... “Tene 'a cora longa!... Nu tene ‘e sorde!”... No! Niente ‘e tutto chesto!… “Nu nce piace!”
. e basta!""NANNINA: Si ‘o vuó pròpio sapé, ‘a nonna era na malafémmena, friscalànema soja4, che  mo sta 'o munno dâ verità!  E 'a mamma era figlia d’ uno 'e passaggio!
STEFANO: Siì! 'O sbinnonno era 'o capo dê brigante! E il suo ricordo ora inquina l'immagine della famiglia!... Oi mà, nuje stamm’ ‘o dujemila!... E 'a gente crere ancora a sti pazzielle?!?
NANNINA: Sti pazzielle, comm’ ‘e chiamme tu, só cose serie! Si po ‘e vulite cagnà vuje 'e regole che só state bone pe nuje!!!
STEFANO: Si tu sapisse quanta guaglione stanno pronte pe sâ piglià, si io 'a lasciasse!...
NANNINA: E a chi aspiette?
STEFANO: ... Ato che 'a mamma e 'a nonna!
NANNINA: E tu falla piglià a uno 'e lloro!... 'A nnammurata a te tâ trovo io... comme fa pe te!
STEFANO: Sì, io 'e sàccio 'e nnammurate toje!... Basta che tèneno 'e puparuole5, pure si só corte e chiatte!!!...
NANNINA: Siì... Troppo che è bello 'o mobbile tuojo!... Chella è brutta comme 'a nu culera!
STEFANO: Oi mà' chella nun è brutta comme 'a nu culera!... E’ un tipo!... E po che c'entra 'a bellezza quanno ce sta l'ammore.
NANNINA: C'entra, c'entra, figlio mio... 'A bellezza t’acconcia 'a razza ed è sempe nu piacere purtà na bella guagliona accanto.
STEFANO: Si tutte 'a pensassero accussì, 'e racchie allora se ponno vuttà sott’ ‘o treno!... Facimmo comme a Sparta, addò accirevano chille che nascevano scunceche6... Ué! Tu ce pienze? Apri il giornale e leggi: <>
NANNINA: ... e 'o treno è ghiuto sottencòppa!
STEFANO: Oi mà, 'e racchie nzerrano l'uocchie7 e se sposano sempe. 'E belle invece tèneno ‘e raglie e rummàneno zitelle!
NANNINA: (Con insistenza) Io vulesse sapé che ce truove dinto ‘a chella guagliona!
STEFANO: Che ce trovo?!?... E' na simpaticona!... Sape stà mmiezo!... E' accussì doce e gentile!... E po è de core!... Oi mà, io a Stella 'a voglio bene e stanotte  appriess' â prucessione m’ ‘a porto sott’ ‘o braccio pe tutt’ ‘o paese. Va buono?!?
NANNINA: E pàteto, si v'incoccia8, ve tozza capa e capa!… Va buono?
STEFANO: Oi mà, facìmmece 'e feste ngrazie 'e Dio!
NANNINA: 'E feste... vèneno pe vuje, nun pe nuje!... Io e pàteto tenimm’ ‘o tuòsseco9 ncuorpo!... E quanno è festa 'o tuòsseco saglie ancora 'e chiù â parte dâ capa!
STEFANO: (Ridendo, per mitigare lo sdegno della madre) Aaaah! Perciò sott’ ‘e feste state sempe ncazzate!... Io invece tengo ‘o core dint’ ô zucchero!
NANNINA: Tu tiene ‘a capa fresca e ‘a mangiatòra vascia! Però ‘e sacrifice l'avimmo fatto nuje pe ve crescere, pe te mannà 'a scola!... Ce simme private dô meglio pe nun ve fà mancà niente. Maje a nu cinema, maje a nu trìato, maje ô mare! (Stefano abbassa la testa, con aria mortificata.) Ê nuttate che avimmo passato scetàte, quanno uno 'e vuje nu steve buono, cô core che zumpava mpietto!... Ore sane10  mbraccio pe v'accurdà11! Vuje a chiagnere e nuje a tremmà pâ paura. Ê corse add’ ‘o miédeco e â farmacia, cô viento e cu l'acqua!... Tutto perduto! Tutto pe niente!... Ê penziere fràcete...
STEFANO: (Interrompendola) Ma me pozzo maje spusà una cô mazzo tanto (e allarga le braccia per far vedere la misura) sulo pecché tu te facive 'e penziere fràcete, quanno io ero guaglione?!?... Mà, tu faje buono a me ricordà ‘e sacrifice che tu e papà avìte fatto pe me. Io non li dimenticherò. Nu me scordo maje!… Però il mio futuro me lo devo costruire  seguendo i miei sogni, le mie aspettative...
NANNINA: Già!... Mo nce tocca sulo 'e ve accattà ‘o mezzo, ‘e ve costruì na casa, ‘e caccià ‘e sorde...
STEFANO: Ahà! A proposito dê sorde, me servono cinquantamila lire pe me accattà ‘e tricchetràcche.
NANNINA: Siì, accàttene cientemila lire!
PEPPE: (Entrando in quel momento) Iuste iuste, pecché me servono pure a me, dimane! Poi cê spartimmo tutte ‘e duje!
NANNINA: Avìte fatto 'a pareglia12!... Guagliù, ma vuje che ve site miso ncapo13?... Nuje stammo senza sorde!… Nun ancora avimmo vennute 'e nucelle! E chist'anno 'o prezzo è pure muscio... Perciò senza che v'allargate!!!
PEPPE: Uh anema bella, quante chiacchiere pe cientemila lire! Facimmo cunto che avimmo fatto duje sacche 'e nucelle 'e meno!!!
NANNINA: Eh già! Chelle già songo assaje... Po 'e jettàmmo pure appriess’ ô Maio! Stammo fresche!... Chist'anno potete pure fare a meno dê tricchetràcche. Guardate a l'ate e facite cunto che avìte sparato pure vuje!
STEFANO: (Sentenzioso) 87! ‘E perucchie!... Meno male che stasera jucammo â tòmmola e ce facimm’ ‘e sorde pê botte! (Rivolto al fratello) Oi Pe', he preparato 'o granurìnio14? L'anno passato nce mancatte.
PEPPE: Mo ce ne sta na sporta chiena!
STEFANO: Oi mà, prepare duje o tre chile 'e strùffole, na busta 'e ficusécche e n'ata ‘e noce ê nucelle nfurnate. Nfurna pure 'e castagne che papà truvatte Ârciano. Oi Pe', po avimm’ ‘a sàgliere d'abbascio â cantina na damiggiàna 'e vino janco, 'o lammeccàto15!
NANNINA: (Con ironia) Signurì, niente chiù?... Duje roccocò, duje raffiuóle...
PEPPE: Ste', ma amm’ ‘a jucà â tòmmola o ce amm’ ‘a mbriacà stanotte?
STEFANO: Oi Pe', aspettann’ ‘o Bambino, amm’ ‘a passà ‘a serata! Ce amm’ ‘a fà quatte risate, amm’ ‘a jucà â tommola, amm’ ‘a pazzià e ce amm’ ‘a régnere ‘a panza!... E po dopp’ ‘a prucessione amm’ ‘a aspettà fino ‘e cinche pe ghì ncopp’ Ârciano a fà ‘o Maio.
NANNINA: Guagliù, mo m’avit’ ‘a fà nu piacere.
STEFANO e PEPPE: (Sugli attenti) Qualsiasi cosa per la nostra cara mammina!
NANNINA: Iate a fà l’augurie ê zie. Accussì io arrecetto16 nu poco 'a casa.
STEFANO e PEPPE: (c.s.) Agli ordini, mammina! Per te qualsiasi cosa!
NANNINA: Mo piglio 'a scopa e v’ ‘a sono ncapa! Ve faccio sfottere io! (Stefano e Peppe vanno verso le camere.)
STEFANO: Ma tu vede nu poco...
PEPPE: ... vulimmo fà ‘e figlie ubbediénte...
STEFANO: ... e currimm’ ‘o rischio d’ acchiappà ‘e mazzate!
(Nannina fa finta di rincorrerli per picchiarli. I due scappano in camera. Lei va in cucina, torna col borsellino, estrae un biglietto da centomila lire e lo poggia sul tavolo, facendo un gesto di rassegnazione.)
NANNINA: (Ad alta voce) Guagliù, cà ce stanno ‘e sorde!
(Dalla camera correndo arrivano Stefano e Peppe; si precipitano contro il tavolo, facendolo spostare. Stefano, più lesto, afferra il bigliettone.)
STEFANO: Iuùh! (Lo bacia e si avvia verso la porta.)
(Peppe lo segue con lo sguardo, poi  gli si avvicina  e lo afferra per la giacca.)
PEPPE: Ohò! Metà è ‘a mia!
STEFANO: Va buono, va! (Fa finta di spezzare il biglietto in due parti.) Ecco qua!
PEPPE: Ooooooh! Che faje? (Lo trattiene. Poi i due ridono, fanno un giro intorno al tavolo, sottobraccio, cantando: <> (Escono canticchiando ancora e tenendosi sempre sottobraccio.)
NANNINA: Tenete ‘a capa fresca. Beate a vuje!

1 Ce he ‘a stà = (ci hai da stare) ci devi stare
2 te taglia ‘a capa ‘a copp’ â noce dô cuollo = ti stacca la testa dal collo
3 ‘O vi’ = Ecco
4 friscalànema soja = sia rinfrescata la sua anima (Nostro modo di dire, quando si ricorda un morto)
5 Puparuole = i soldi
6 Scunceche = deformi
7 'nzerrano l'uocchie = chiudono gli occhi
8 si v'incoccia = vi sorprende
9 ‘o tuòsseco = il veleno
10 Ore  sane =ore intere
11 pe v'accurdà = per calmarvi
12 'a pareglia = la coppia
13 che ve site miso ncapo = cosa vi siete messo in testa
14 granurìnio = granturco; per metterlo sulle cartelle della tombola
15 lammeccàto = mosto non fermentato; per rendere dolce il vino bianco
16 arrecetto = rassetto
---------------