’A raccolta differenziata
«Avimm’ ‘a fà nu poco ‘e pulizia,
ce stanno troppi mbruoglie pâ casa
e nu tengo ‘o spazio pe mettere chiù niente!
Sosete ampressa ô posto ‘e fa ‘o fràceto sott’ê cuperte!»
me dice muglierema vuttànnome dô lietto.
Mamma mia bella, quanta schifenzìa
avimmo accumulato int'â stu mese!
Cà ce vò nu cammio cô rimorchio
pe fa unu carico tutt’inzieme.
Mannaggia a chi ha mettuto mmiezo ‘a differenziata!
E mo comme ‘a metto nomme,
io nu capisco propio niente!
Addò va ‘a scatula chê Cd-Rom?
‘E spazzuline dê diente,
‘e rete dê pisielle,
‘e tappe dê barattole,
‘e carte nzivate ‘e uoglio,
‘a carta oleata e chella carbone,
‘a carta vetrata e chella cu l’alluminio?
‘E stracce addò dòrmeno ‘e cane
sò multimateriale o indifferenziato?
Se ’ntravogliano ‘e cerevielle chê stentine
pe sistemà ‘a cosa ogne juorno.
Allora voglio fa comme fanno l’ate,
tanto nisciuno dice niente!
‘O divano rutto câ pultrona dô nonno
‘o porto sotto ‘o ponte ‘e l’autostrada;
‘a lavatrice cô frigo viecchio int’ô vuosco d’Arciano;
‘o sfratto dâ cantina int’ a quatto buste nere
addaret’ â chiesa ‘e Gesù e Maria;
‘e tappe, ‘e rete ê carte unu volo
dô finestriello dâ macchina;
chest’ata busta chiena chiena
‘a lascio annanze ô canciello ‘e n’ata via!
Addò ‘e metto ‘e raste dê piatte rutte?
‘E faccio vulà int’ô giardino dô vicino
e chi s’è visto s’è visto!
Aaaah! Mica po è accussì difficile fa ‘a differenziata
se tiene nu poco ‘e fantasia pe truvà ‘o posto justo!!!
(Baiano, 24 dicembre 2014)