’A zitella
Quanno tenevo vent’anne
nnanze ô munumento d’ ‘e cadute
nzerravo l’uocchie e penzavo:
m’aggio muorto ‘e famme ‘a quanno ero piccerillo;
maje na lira ncuollo,
maje nu bagno ô mare;
‘a scola ievo, è ‘o vero,
ma ch’ ‘e pezze nculo!
‘E cumpagne mieje?… Ahé! Peggio ancora!
Nu teneveno ‘e sorde
manco pe ghì ‘o cinema ‘a dommeneca!
Da ‘e tasche nu careva na lira
manco si ce giravano sottencoppa!
Na vota, era maggio,
scennette da Avellino l’Onorevole
p’ ‘o cumizio mmiez’ ‘a chiazza
e ce dette ‘a benedizione.
“Baiano è come una bella donna
affacciata al balcone”
ce dicette cuntento cu l’uocchie ‘a fore.
“Prima o poi troverà un buon partito
e ben si mariterà!”
“Chisto ce sta scaricanno”,
penzavo io che poco capevo ‘e puliteca,
“p’aiutà l’ata gente d’ Avellino!”
Ma nuje po currévemo a vutà
e a mantené ‘o sacco
c’ ‘a speranza ‘e vedè ‘o paese nuovo!
Tutte ‘e matine ‘a bella femmena
s’affacciava ncoppa ô barcone d’ ‘a casa,
ma nisciuno guaglione ‘a guardava
manco c’ ‘a ponta d’ ‘o binocolo!
Baiano steva là comme a primma,
a vedè crescere l’ati paese.
E nuje cuntinuàvemo a ce puzzà ‘e famme!
Doppo cinche anne, n’ata vota
scennette da Avellino l’Onorevole
e ce dette n’ata vota ‘a benedizione.
“Baiano è come una bella donna
affacciata al balcone”
ce dicette chiù cunvinto ancora.
“Prima o poi troverà un buon partito
e ben si mariterà!”
“Chisto ce sta n’ata vota scaricanno”,
penzavo io che mo capevo nu poco ‘e chiù,
“p’aiutà l’ata gente d’ Avellino!”
Però nuje currévemo sempe a vutà
e a mantené ‘o sacco pe Isso.
‘O iuòrno appriésso tutta cuntenta
comme spuntaje ‘o sole ‘a bella femmena
s’affacciaje ncoppa ô barcone d’ ‘a casa,
ma nisciuno ‘a guardaje manco c’ ‘a cora ‘e l’uocchie!
Baiano steva sempe là comme a primma,
ad aspettà l’aiuto d’ ‘o Signore
se scenneva d’ ‘o cielo!
L’ata gente vicina cresceva e nuje…
nuje cuntinuàvemo a ce puzzà ‘e famme!
Nu poco a vota però accumminciajeno
a spuntà ‘e capille grigie cu ‘e primme rughe
nfronte a chella bella signurina,
ma l’Onorevole ormai Senatore
senza maje aizà l’uocchie
pe guardà ncoppa ô barcone ‘e chella casa
ripeteva sempe ‘e stesse chiacchiere!
“Baiano è come una bella donna
affacciata al balcone…
Prima o poi troverà un buon partito
e ben si mariterà!”
Ma quale buon partito?
Quale marito d’oro?
Baiano steva sempe peggio,
jeva arreto e maje annanze.
L’ata gente vicina cresceva, cresceva, cresceva
e nuje?…
Embè nuje cuntinuàvemo a cuntà ‘e peducchie!
Nu iuòrno senza crianza
accumminciajeno a cadè ‘e diente
a chella bella femmena,
a spuntà ‘e capelle ianche e ‘a pelle a se arripicchià!
Ma a maggio ‘o Senatore scenneva d’ Avellino
e cu ‘e spalle ô barcone
ripeteva sempe ‘a stessa cantilena!
“Chisto ce sta piglianno pe culo!”
dicev’ io scunzulato cu l’uocchie apierte!
“E nuje mantenimmo ‘o sacco
p’ ‘a gente d’ Avellino!”
Na matina ‘a signorina
s’affacciaje ncoppa ô barcone e…
Madonna mia d’ ‘o Carmine
che schifezza ‘e femmena s’era fatta!
Brutta comme a nu culera, senza ‘e diente,
cu quatto capille ncapa e l’uocchie appise
e doje zizze mosce mosce
ca ‘e puteva girà attuorno ô cuollo
comme a nu sciallo ‘e lana!!!
E ‘o Senatore cuntinuava a sfottere a gente!
“Baiano è come una bella donna
affacciata al balcone...”
Allora nu figlio ’e ndrocchia
annascuso mmiez’ ‘a folla
alluccaje cu tutta ‘a forza d’ ‘a voce:
“Senatò, ma vuje l’avite chiù vista
chella bella femmena ncoppa ô barcone?
Guardate mo comme s’è fatta!”
‘O senatore avizzaje l’uocchie…
e rimmanette sicco ncoppa ô fatto;
p’ ‘o scuorno calaje l’uocchie
e lle s’affugaje a parola nganna!
“Ma vuje nun avite capito
nu cazzo d’ ‘a puliteca!”
dicette tutto ncazzato!
“Site venute addò me
sulo pe fatte vuoste e d’ ‘e pariente
o pe quacche amico c’ ‘a famiglia grossa!
Maje pe nu problema d’ ‘o paese!
E mo che vulite a me?”
“Senatò, Baiano nun s’è mmaretata!
È rimasta na brutta zitella!
E ‘a colpa è nu poco pure ‘a vosta!
Avite penzato sulo a regnere ‘o sacco
e a purtà ‘e vote a casa vosta!
Dinto a tante anne nun avìte maje capito
che ‘a gente vutava a vuje c’ ‘a speranza ‘e migliurà’!
E nuoste ccà a Baiano
‘a puliteca nun l’hanno maje saputo fà!
E mo pe rimedià è tiempo e ce dà na mano!
Nu poco vuje, nu poco nuje
vedimmo ‘e aizà sta varca!
(Baiano: Dicembre 2004)
(Baiano: Dicembre 2004)