© © 2023 - Carmine Montella, Baiano (Av). Senza l’autorizzazione scritta del titolare del copyright è vietato l’uso di testi, immagini e video del sito.

NANNINA: Totò, Stefano è troppo buono. Quanno capisce   comm’ è 'a gente, metterà nu poco 'e sale ncapa... E quanno imparerà che ncopp’ â terra ce stà chiù cattiveria che bontà...
TOTONNO: Nu farà chiù niente pe nisciuno!
NANNINA: No, chesto no!... Chi nasce quadro nu more tunno! Ha da capì che quanno aiuta quaccheduno, nun s'ha da aspettà gratitudine. Anzi, che na bella pugnalata ê spalle nisciuno ce ‘a leva... Si 'o sape primma, po nu resterà male!
TOTONNO: Bella filosofia!... 'A gente chesto aspetta pe approfittà 'e te!
NANNINA: Pròpio tu parle accussì? Tu che sulo â vecchiaia he cagnato nu poco... Fino a quarant'anne sì stato tale e quale a Stefano... Quante vote io te dicevo: “Totò, lascia perdere. Po te piglie collera!” E tu niente, manco p’ ‘a capa! “Totò, chi t’‘o fa fà? Nisciuno s'allicorda 'e chello che tu  faje pe loro!... E quanno chiù faje, chiù sì male vuluto!” Ma tu vulive fà pe forza l’altruista, si manco te l’aveva ordinato 'o miédeco!
TOTONNO: Che c'entra 'o miédeco?... Io 'o facevo pecché me piaceva primma 'a me!... Comme se dice? Me sentivo realizzato!... E po me piaceva d’ aiutà l’amìce!
NANNINA: E po, ogne vota, t'incazzave e dicìve: “Nannì, chesta è l'ultima vota che faccio na cosa pe l’ate!” Po nu facive passà manco nu mese e accumminciave d''o capo!... T'allicuorde quanno fràteto-cucìno s'appresentaje tomo tomo a casa cu chillo amico suojo? Comme se chiammava?
TOTONNO: Ah! Pasquale.... “Totò, - me dicette - dà n'occhiata a stu presepe che ha pruggettato Pasquale. L'avimm’ ‘a fà dint’â chiesa 'e Sant'Apostoli... Tu sì pratico 'e sti cose... Si nce daje na mano...”
NANNINA: Tu 'o guardaste e sùbbeto t'ammuccaste!... E 'o juorno appriesso già stive cô martiello mmano.
TOTONNO: (Con espressione di gioia) Io facette ‘o chiù bello presepio dâ vita mia! 'A gente rimanette câ vocca aperta!
NANNINA: E tutte dicètteno “Bravo!” a Pasquale, 'o pruggettista.
TOTONNO: (c.s.) L'anno appriesso Pasquale disegnaje nu presepio che nun s'era maje visto a Baiano... Io ce perdett''a capa pô fà. Nu mese 'e lavoro, tutte 'e sere. Che capolavoro! 'A gente nu crerèva a l'uocchie suoje...
NANNINA: E tutte dicetteno “Bravo!” a Pasquale, 'o pruggettista.
TOTONNO: L'anno appriesso Pasquale avette n'ata bella idea...
NANNINA: E tutte dicetteno “Bravo!” a Pasquale, 'o pruggettista.
TOTONNO: L'anno appriesso, mentre vunavo1  'e nucelle, penzav' ô presepio che s'aveva ‘a fà a Natale dint''a chiesa. Me venette n’ idea favolosa. T'allicuorde?
NANNINA: E comme mâ pozzo scurdà!... 'A capanna dô Bambino dint''a chiesa 'e Gesù e Maria!
TOTONNO: Ce vulette tutta ‘a scienza mia pe costruì 'a collina câ chiesa e cu l’ulive... e Baiano sotto, câ chiazza, 'a ferrovia, 'a vasca mmiez''o mercato cu l'acqua vera ê pisce dinto, cu ‘e pasture che partéveno dê Vesuni e sagliéveno pe ghì a veré 'o Bambino a mezzanotte... Che opera d'arte!
NANNINA: Quanno vedette 'o pruggetto, 'o prevete scette 'a for''e panne!
TOTONNO: E subbeto io me mettette all'opera!... Che soddisfazione!... 'A gente chiagneva quann''o venéva a veré... Sulo a Pasquale nu piacette!!!
NANNINA: S'è sempe detto: 'a gelosia ceca 'a vista! Allora isso pigliaje nu viecchio pruggetto, manco dô suojo, e facette costruì n'ato presepio dint''a chiesa 'e Santa Croce! (Rientra Stefano. Va a sedersi sul divano.)
TOTONNO: Che fetente che fuje Pasquale!... Doppo tutto chello che io avevo fatto pe isso, nun s'avev’ ‘a cumpurtà accussì! E pe jònta ce truvaje tutte 'e rifiette 'e stu munno. Jeva dicenno ch'era na schifezza!... Che ‘a chiesa era piccerélla… L’ulive troppi stuorte… E 'o parrucchiano me l'aveva fatto fà pecché io ero amico dô Sinnaco!!!
NANNINA: E jeva dicenno che tu ire buono a costruì 'e casette, 'e ponte, 'e pasture... ma 'e pruggette nun erano cose pe te!
TOTONNO: E io ce rimanette assaje male!
NANNINA: Accussì te cuciste chê mane toje e capiste che 'a gente te vò bene sulo quanno tu ce sierve!
STEFANO: Mo l'aggio capito pur' io!… Oi mà, io só fesso!… Io dovevo capirlo che ieva5 a finì accussì!… (Rivolto al padre) Papà, ‘o saje? Io ê vote penzo che songo proprio sfurtunato!… Aggio nato dint’ ‘a na brutta famiglia, addò ‘e pariente te trattano sulo pecché primma o poi te ponno sfruttà!…E sapenno che tu saje fà mille cose, te chiàmmeno mille vote. Ma si ce faje 999 cose bone e una sbagliata, tu pierde tutto chello che aje fatto ‘e buono e nun te saluteno chiù!!!… E po ce sta sulo ‘a mmìria!… Si faje nu passo annanze,  invece d’ esse cuntente, che uno dâ famiglia fa fà bella figua â famiglia, no!… fanno ‘a faccia storta. Comme si tu ce levasse coccosa ‘a dint’ ê sacche !!!… Io invece faccio zumpe ‘e gioia, quanno nu frate-cucìno o nu zio va a migliorà!… Po ce sta ‘a zia Rusinella che, quanno tu ‘a ncontre6, a ghì a ghì t’avizza l’uocchie nfaccia e te fa na resata furzata che pare na mezza storda!… Pare sempe che ce staje arrubbanno caccosa!… Quanno vèneno ‘e feste, ê vaje a salutà…  te ‘nduòsseche ‘e feste!!!
NANNINA: Stè, che t'aggia dicere?  
TOTONNO: In fondo a colpa è nu poco pure a mia!…
STEFANO: Papà, e tu che c’entre?
TOTONNO: (Con senso di colpa) C’entro!… C’entro!… Io l’avev’ ‘a penzà che jeva a finì accussì… Quanno tu ire8 piccerillo, io nun te dovevo fà ji 9 a casa soja. “Nannì, – io dicevo a màmmeta – nun ‘o fà ji’ a Stefano add’ ‘a zia Rusinella!… Chella tene ‘a capa cumm’ ‘a luna. Na vota chiena e na vota vacante!” Ma niente ‘a fà. Màmmeta, pe nun te fà chiagnere, te faceva ji’.
NANNINA: Nuje stévemo 'e casa vicino. 'E fràtete-cucìne venéveno sempe a pazzià tutt'e duje a casa nosta... pure quanno tu nun ce stive... Vuttàveno 'e giocattole pe terra, s'assettàveno ncopp’ â tàvula, zumpàveno 'ncopp’ ô lietto matrimoniale e quanno tu teniste 'o murbillo ‘o facètteno pure scassà!
STEFANO: (Interrompendola) Io invece nu putevo tuccà niente addu loro. (Imitando la voce della zia e mimando in modo burlesco le azioni) “Nu tuccà cà!... Nu tuccà là!... Nu sàgliere cà!... Nu sàgliere là!” E chi sô scorda?
NANNINA: (Continuando il racconto) Pecché nu sapeva chello che facéveno 'e figlie â casa nosta!... Ma chella zìeta teneva a capa che ce girava sempe storta, dâ matina â sera, e ce ive pe sotto pure tu!... Tu tuzzeliàve e essa te ne mannava senza manco aprì 'a porta o te babbiava cu nu sacco 'e buscìe,  pure in italiano. (Scimmiottandola) “Stanno riposando!” e io 'e sentevo zumpà' dint’ â cammera... “Stanno studiando!” Penza nu poco: 'o mese d' aùsto!...
STEFANO: Eh! M’allicordo… M’allicordo!!!
NANNINA: Na vota te dicette: “Si stanno facendo il bagno!”, mentre chille se stéveno nfruscinanno10 dint' a l'uorto. Pe nu parlà 'e soreta che nun 'a faceva trasì quasi maje, quanno già ce stive tu... e se ne turnava chiagnenno chê lacrime fino a terra “Mammà, pecchè 'a zia nun ce fa trasì?” E io che ve dovevo rispónnere, oi Stè?
STEFANO: Oi mà, io m’allicordo ancora quanno 'e fràtemecucìne me dicéveno: “Mammà nce ha dato l'ordine 'e nu fà trasì a sóreta!” Io po me stevo zitto  e nun te dicevo niente o si nno tu nu me facìve ji manco a me!
TOTONNO: Sapisse quanne vote me veneva voglia e mâ chiammà pe le dìcere nfaccia: “Neh, storda, invece ‘e fa chiàgnere ê criatùre… si nun te fa piacere che véneno â casa toja, pecchè nu parle chiaro e tunno?”
NANNINA: E nuje nun 'e facimmo venì chiù!…Po ce penzavo ncoppa e continuavo a fà finta 'e niente, pe quieto vivere… Chella femmena nu sapive si l’aviv’ ‘a  piglià11 p’ ‘a capa o p’ ‘a cora!… Io nu dicevo niente a pàteto, pe nô fà piglià collera e pe nê fà appiccicà!
TOTONNO: Nannì, ma tu pienze che io nun ‘o sapevo?… Me facìve pròpio accussì fesso?… Oi Stè, pur’ io pe quiete vivere, facevo ‘o fesso pe nu ghì a guerra! ‘A lasciavo fà… e me steve zitto! Aje da sapè12 che a lavare ‘o ciuccio cu l’acqua e cô sapone, ce pierde l’acqua e ‘o sapone. (Scrollando le spalle) Che putevo fà?… 'A cumpatevo pe truvà pace!
STEFANO: Però ‘e figlie suoje…
TOTONNO: Però 'e figlie suoje potevano cuntinuà 'a mettere sottencòppa a casa nosta...
STEFANO: ... e io e sòrema, invece, avévemo ‘a fà13 'e surdate a' casa soja, o si nno... (e fa il classico gesto con    le mani per indicare “fuori!”, accompagnandosi con un fischio.)
NANNINA: Stè, tu ire buono buono e cuntinuave a bussà â porta ‘e zìeta…
STEFANO: E zìema me chiureva ‘a porta nfaccia nu juorno sì e nu juorno no!… Mô allicordo comme si fosse mo!…
NANNINA: Oi Stè, 'a vita è fatta ‘e ‘mparamiente. Perciò statte accuórto quanno te sciglie 'a mugliera. Vide addò mitte l'uocchie.
TOTONNO: E allicuórdate na cosa: nun  avé paura d' 'e femmene brutte, ma 'e chelle storde. Si ne trase una dint' 'a casa, aje finito ‘e campà... t’arruìne pe sempe. E allicuórdate n’ata cosa: guarda sempe 'a famiglia... 'A mamma, 'o pate...
STEFANO: ...'O nonno, 'a nonna... ‘A saccio già sta canzone!... (Con aria seria) Papà, sei proprio un vecchio conservatore!
TOTONNO: (Annuendo) Sì, songo pròpio come dice tu!... Si vaje a vedè dint’ ô vascio, vide quante cose vecchie tengo stipate.
STEFANO: Papà, nun aggio capito, però, che vuò dìcere a proposito dâ mamma, dô pate...
NANNINA: (Capendo l’allusione del marito e per evitare scintille proprio la sera della vigilia, cambia discorso.) Stè, io tô vulevo sempe dìcere. “Statte accorto dâ zia Tattella!... Chella, quanno tu ire piccerillo, accussì... accussì... accussì...” Ma po, penzanno che tu risponnive: “Oi mà, che dice?... Vuje nu capite niente!” (Pecché vuje giuvine dicìte sempe accussì!), aggio preferito 'e te fà cócere chê mane toje!
STEFANO: E m' aggio cuotto buono! Me serve pe me mparà!... Però, quann' ero piccerillo, ingenuo comm' ero, io penzavo che 'a zia dicesse 'a verità, quanno nu me faceva trasì, anche si io me pigliavo collera lo stesso!
TOTONNO: Ah! Ah! Ah! ‘A verità!… Chi, chella?… ‘A verità??? Ah! Ah!… E tu che ne saje, figlio mio?… Ma si chella, pe se fà crèrere, nun ‘a dice manco ô marito!… E a furia ‘e raccuntà fesserie, chella busciarda m’ha fatto appiccicà tante vote cu fràtemo, cô rischio ‘e ce sparà! Chella 'a verità nu sape manco addó sta 'e casa!
NANNINA: (Dando corda al marito) Tant' anne fa, zìeta s'appiccicaje câ verità... e nun ha fatto pace chiù!
STEFANO: Da grande, però, mi ha trattato sempre bene!
TOTONNO: Pecché le potive servì!... Stè, tu he sapé che zìeta ha fatto sempe accussì! (Si avvicina al figlio, camminando con tutta la sedia senza alzarsi e imita un gatto che vuol graffiare.) Comme a na vatta!… Che fa 'a vatta quanno tene famma?
STEFANO: Te vene  a liscià!
TOTONNO: Pròpio accussì! Te vene a liscià!... (Con il palmo della mano destra accarezza il dorso della mano sinistra.) E appena tu gire ‘e spalle… ‘a vatta che fa?
STEFANO: (Con ingenuità) ‘A vatta che fa?
TOTONNO: (Imitando una gatta) Zac!… Te scippa!
STEFANO: (Con un’espressione di dolore sul viso) Zac!… Te scippa! Quanno po sente n’ata vota famma, chiano chiano... zitto zitto te vene a liscià e te fa fesso...
NANNINA: Pecché uno tene 'o core buono!
TOTONNO: Zìeta Tattella è tale e quale! Quanno le serve  caccòsa... aaah! è n’artista, comme ce ne stanno poche. Usa na tattica particolare. Accummencia a te fà 'a corte; po te saluta cu na resatella scema scema e te fa salutà pure dê figlie e dô marìto;  si sente 'e passe tuoje va cchiù chiano p’attaccà a parlà e pe te dìcere na cosa o n’ata; vene pure a casa toja cu na scusa 'e niente... E tu sì 'o meglio, puó esse sicuro!... Quanno po ha fatto 'o fatto suojo, nu poco a' vota t’alluntana, t’accummencia a salutà primma  fredda fredda… po cu nu piccolo muvimento d' 'a capa... po' se fa trovà sempe 'e spalle, fa finta 'e nun te sèntere e nun se gira  manco si tu spare ‘e cannunate. Ma chella 'e recchie 'e tene bone, cómm' 'a volpe!... Ê figlie e ‘o marìto fanno comme 'a essa!... E uno nu sape chiù si ha da rìrere o ha da chiàgnere!... E pe iónta 'e ruotolo spetta l’occasione pe s’appiccicà fino a quanno po nu le sierve n'ata vota e se vótta sotto cómme sape fà sulo essa!… Allora tu ‘e cumpiatisce pe chille che songo, (calcando la voce) cioè na banda ‘e storde, ê manne a chillu paese!… E po pe duje anne nun te saluta chiù!
NANNINA: E meno male che  ncopp' â terra só poche 'e persone cómme a zìeta o si nno ce sarebbe 'a guerra dinto a tutte 'e famiglie!
(Entra Tonino. Si guarda intorno. Cerca di stare lontano da Stefano.)
TOTONNO: E po va pur' â chiesa a domménica a se dà 'e pugne mpietto!
TONINO: (Mima l’azione, colpendosi il petto) Sicuramente fa tremmà a chiesa da dinto 'e fundazione!
NANNINA: Io vulesse proprio sapé che va a dicere ô parrucchiano!... Si ce dice 'a verità 'o fa scappà da dinto 'o cunfessionale!
TONINO: Perciò domménica passata verso  miezeiuórno  io vedette a zì prevete fuì pô corso câ vunnella mmano, si manco 'o curreva appriesso 'o riàvulo chê corne.
TOTONNO: (Prende una pianella in mano) Fa sempe 'o spirituso tu!... (La lancia contro Tonino che nel frattempo si è dato alla fuga.) Voglio veré quanno sô leva 'o vizio! (Dalla porta della camera Tonino fa alcune smorfie e poi scompare.)
STEFANO: (Con amarezza) Però, comme è brutta ‘a vita accussì! E quanno è festa ‘a vita è ancora chiù brutta, pecchè nu può stà nzieme!… Nu può mangià attuórno â stessa tàvula. Vaje a dà l’augurie sempe cu n’angolo ‘o core! Pienze sempe : “Va truvanno mo che succède!”… Mamma mia, la discordia scava in molte famiglie un solco profondo… e il fiume dell’odio vi scivola dentro!… Che brutta famiglia è ‘a mia!… Ce stanno famiglie – invece - addó mamme, pate, nonne, figlie, zie, cugine, pariente stritte e pariente luntane s’addoreno e se vonno bene e stanno sempe nzieme felice e cuntente!!! (Sconfortato, si fa una scrollata di spalle e se ne va in cucina.)


(Cala il sipario.)
------------------------------------------------------------------------------------
1 Vunavo = raccoglievo
2 s'aveva ‘a fà = si doveva fare
3 pe jònta = per aggiunta
4 troppi = nota grammaticale: davanti a nome con consonante vuole la “i”
5 Ieva = andava (sarebbe andata)
6 ‘a ‘ncontre = la incontri
7 a ghì a ghì = a malapena
8 ire = eri
9 fa ji’ = fare andare
10  se stèveno nfruscinanno = si stavano arrotolando nel terreno
11 si l’aviv’ ‘a  piglià = se la dovevi prendere
12 Aje da sapè = devi sapere
13 avévemo ‘a fà = devevamo fare
---------------