La pace
Tema: “La pace”
disse il professore di italiano ai suoi alunni.
«E io mo che ce scrivo?»
dicette Nicola sotto sotto
a Salvatore che manco ‘a penna teneva
dint’â cartella.
«La pace unisce gli uomini!
La pace rende felici!
La pace è quando ci vogliamo bene!
La pace è bella e buona!»
accummenciaje a scrivere Giovanni.
«Sì, è bella e bbona comme ‘a sora cucina,
cu ll’uocchie azzurre e ‘e capille bionde!
Noò, guaglù, nun va buono accussì!
Avimm’ ‘a truvà n’ato penziero!»
«Allora scrive tu, invece ‘e fa ‘o filosofo!
Tu che piglie sempre TRE ô compito!»
lle dicette Giovanni e le buttaje ‘o foglio nfaccia.
«Nu sbaglià câ vocca, Giuvà,
o si nno te rompo ‘a faccia!
Stu scemo rimbambito peggio d’ ô padre!»
«A chi rompe ‘a faccia? Famme vedè si sì capace!
Mo… ccà… nnanze a tutte… a pietto a pietto!»
Manco fenette ‘e parlà
che vulajeno schiaffe, pugne ‘e cauce miezo ê cosce.
«Smettetela!» urlò il professore.
«Che maniere sono queste!
Su, datevi la mano e fate PACE!»
Accussì Nicola iette vicino a Giovanni
e mentre lle teneva stretta ‘a mano dicette:
«Guagliù, aggio capito cos’è ‘a pace!
Pigliate ‘o foglio e scrivite!
Facite ampressa primma che m’ ‘o scordo!
‘A pace è quanno duje cumpagne
se vegneno ’e mazzate!
Io te dongo nu pugno nfaccia a te…
e tu me daje nu caucio a me!
Io te rompo ‘a capa a te
e te manno ô spitale!
e tu me cieche n’uocchio a me e poi …
e poi ce strignimmo forte forte ‘a mano
e facimmo PACE!»
«Nun ce avevo maje penzato!»
dicette Salvatore cu tanta meraviglia.
«Ma po che ce sta scritto
dint’ô libbro ‘e storia?
Quanno facevano ‘e guerre
‘a gente se dèva tanta ‘e chelle mazzate
che Dio se ne era scurdato!
Io accido a te… tu accide a me!
Io sparo a te… tu spare a me!
Cannone, fucile, spade ‘a ccà e a là!
Bracce che vulaveno e cape che zumpaveno!
Quanno po s’èreno sfastedeate,
s’assettaveno attuorno a na tavula
e scriveveno: “Io aggio vinto… tu aje perzo!
È fenuta ‘a guerra!... Firmate ccà…
e tutte â casa da ‘e mugliere!”
Chi a into a into… chi a fore a fore!
Avèveno fatto ‘a Pace!
(Baiano, 20 Maggio 2010)