Riesumazione
Pe diece anne so stata dint’â bara sotto terra
senza vedè chiù a nisciuno,
senza sentì na voce, nu rummore,
n’alito ‘e viento, ‘e chiacchiere dâ gente,
dint’â pace dô Signore.
Mo me trovo nfaccia ô muro
a piglià nu poco ‘e sole
p’asciuttà chest’osse chê pellecchie,
tutta annura câ cosa a fora
e chê zizze mosce ncopp’ â panza
comme a na puttana ‘e mieze â via.
Ce manca sulo ‘o cupertone
cu nu poco ‘e fuoco
e nu pagliaro pe fetiente.
Si ce penzo che da viva me facevo
rossa rossa comme a nu puparuolo
quanno ascéveno ddoje dete ‘e cosce
a copp’ê ginocchie,
che scuorno mo spugliata
annanze a tutta ‘a gente
e vicino a chist’ato ccà cô culo a fora
e girato ‘e spalle, puveriello!,
pe nu vedè chello che addà succerere.
Arriva uno cô curtiello mmano
e piezzo pe piezzo ‘o scorteca vivo vivo
senza e le fa scì nu poco ‘e sanghe.
Mamma mia bella, che murtificazione?
E chesta fine aggi’a fa pur’io?
Ma vuje site pazze e senza pietà!
E nun era meglio ‘e me lascià
dint’â fossa che vierme
fino ô giudizio universale?
Mo accssì io moro n’ata vota!
Si sapevo ‘e fa sta fine
me facevo cremà dint’ â nu furno
e lasciavo ‘a cennere ô vento!
(Baiano, 15 Novembre 2014)