Passianno pô vuósco d’Arciano
Ah che bella jurnata ‘e sole ogge
cô cielo azzurro e l’aria doce!
Mo ce vò na bella passiata
pe vie d’Arciano miezo ô vuòsco
e capì addò acccumincia ‘o paraviso.
Duje cane nire cô pilo lungo
me fanno festa pô mangià,
na biscia s’annasconne sott’ê frasche,
‘e farfalle assaporano ‘e sciure,
nu culochiatto zompetta appriesso a me,
na pica vola da nu castagno a nu licino
e na mmorra ‘e aucielle vola pe ll’aria!
Nu tappeto ‘e foglie chê riccie spinuse,
chê ciclamine e l’autunno attuorno
me fanno ncantà pe l’ammirà
e nu prufumo ‘e vuòsco
me trase chiano chiano sott’ ‘a pelle
e règne ‘o core che me batte mpietto!
Ncopp’ê giostre nu pate allèro
mena ‘o figlio annanze e arreto
e ‘a mamma dà ‘o latte ô piccirillo
assettàta ncopp’ â l’èvera addurosa.
Comme a na musica ‘e viuline
nu ventariello me fa cumpagnia
ntramentre vaco cô bastone
tra na chianta e file ‘e rame secche.
Starria cient’anne a respirà stu piacere!
Già vaco cô penziero addò n’arriva ‘a vista
ma… all’intrasatta che veco?
Maronna mia, nun ce pozzo crèrere!
Doje pultrone cô divano, nu matarazzo,
na lavatrice e quatto ròte ‘e macchina
miez’ ‘a na muntagna ‘e munnezza!
‹‹E’ nu suonno›› me dico pe me dà pace,
‹‹o è overamente n’ ‘arruìna? ››
Ma facenno ll’ati passe tuorno tuorno
trovo butteglie, buste, ‘o cupierchio ‘e nu cesso
e nu mare ‘e schifezze che nu ve dico
e dâ terra sale na puzza che me leva ‘o sciato!
Pure nu bigliardino cu tutt’ ‘e stecche!
Ma comme cazzo l’hanno purtato fino a là?
Se ne scenne ‘o core pô scuorno
e me ne torno â casa triste e scunzulato!
‹‹Nun ce sta niente ‘a fà›› penzo ntra me e me.
‹‹ ‘A gente ‘e niente nu sape chello che fa
e ogne juorno scarrupa chê fatte
chello che ‘o Criatore ce dà!››
(Baiano, 29 Novembre 2014)
(Baiano, 29 Novembre 2014)