Sisina ‘a Mammona
‘A chiammaveno sisina ‘a Mammona
sulo pecchè era figlia ‘e Michele ‘o Mammone.
N’artista dô legno ‘o pate
n’artista dô ricamo ‘a figlia!
Chê mane soje avea cusute
‘e currede dê meglie spose ‘e Cicciano
ricamo doppo ricamo, filo doppo filo
cu l’arte che sule ‘e buone teneno!
Santa donna, santa socra
semplice e buona.
Poche parole diceva
ma parlava cu l’uocchie,
doje perle nfronte grosse e nere
belle comm’ô sole!
Sì, era bella socrame!
Bella da giovane e da vecchia di più!
Quanno me spusaje ‘a figlia
io ‘a sfuttevo pô curredo.
Nu patrimonio pe chi l’intendeva!
<<’E lenzuole spurtusate m’avite purtato>>
le dicevo <<pâ dote ‘e mia moglie?
Si ‘e cattavo ncopp’ ê bancarelle ‘e truvavo meglio.
Tutte chine ‘e buche e stracciate,
manco se sê nne mangiate ‘e surece!>>
Se faceva na resata cu l’uocchie spaparanzate
pecchè sapeva che io pazziavo
e sapevo apprezzà l’arte che me donava.
L’uocchie suoje me dicevano
che ‘o core era cuntento:
‘a figlia steva in buone mani
e ‘o viennero (che song’io) steva in buone mani!
Po diceno che ‘e suocere sò ‘e suocere!
Sì, è overo! ‘E suocere… so ‘e suocere!
Comme te crisce accussì tê truove!
(Baiano, 1 Gennaio 2015)