Elezioni comunali (rivisitata)
Na sera ‘e maggio verso ‘e nove.
Toc! Toc!
Chi é?
Songo ‘o quatto,
dâ lista dâ Campana!
Trasite! Trasite!
Se vulite favorire...
No, no! È ampréssa pe mangiá!
Dicite! Dicite!
Io vulesse fà ‘o cinema,
‘o campo, ‘a pista d’ ‘e bocce
e ‘a chiazza nova!
E pe fà chesto
m’ avit’ ‘a vutá’!
‘A casa mia po
é sempe aperta!
‘0 quatto vene eletto,
festeggia ‘a vittoria
e chi s’è visto… s’è visto,
e nun se fa chiù vedé!
Sale e scenne ogni matina
ncravattato e ndaffarato,
dice e fà sott’ ‘o comune,
parla ride nsacca e port’ â casa:
é arrivato ‘o mumento pe mangiá!
Doppo cinche anne
na sera ‘e maggio verso ‘e nnove.
Toc! Toc!
Chi é?
Songo n’ata vota ‘o quatto.
Mo peró songo dâ lista dô Campanile
Dicite! Dícite!
Sapite? Vulevo fà
‘o cinema... ‘o campo ...
‘a chiazza nova ...
Vulevo fà tante ccose
ma nun me l’hanno fatte fà!
Ce vonno chiú voti
pe essere chiù forti.
Vutateme tutte quante d’ ‘a famiglia
e io ve prumetto che sta vota
ve faccio ‘o paese nuovo!
L’ aje sentito, mugliera mia?
Vuleva ... vuleva ...
Ma chillo nun ha fatto propio niente!
Chillo nu sapeva fà
‘o chirchio manco cô bicchiere.
Ha penzato sulamente
a s’ abbuffà ...
a se régnere ‘a panza.
E comme a n’auciello affamato
s’è mangiato pure ‘e briciole ‘e pane!
Ha dato ‘o posto ô frate,
ô nepote e ô cainato,
e ha aizáto n’atu piano
ncopp’ ‘a casa senza ‘a licenza.
E mo che facimmo, marito mio?
Ce ‘o dammo ‘o voto?
Sì, mugliera mia.
‘o vutammo ‘o quatto,
però…pâ faccia dô frate
dô nepote e dô cainato,
vutammo ‘o quatto...
‘e chell’ ata lista!
(Baiano, Luglio 2015)