A Padre Pio, ora Santo
Quanta mestiere ha fatto pe colpa mia.
Quanta vote l’aggio chiammato
quanno sbattevo ‘a capa contro ‘o muro:
«Padre Pio, mo sulo vuje me putite aiutà!»
E Lui cu l’uocchio amuruso e ‘a mano lesta
ha fatto pe me ‘o masterascio e ‘o fravecatòre,
‘o miédeco e ‘o scupatore,
‘o pittore e ‘o riggiularo,
‘o zappatore e ‘o ferraro
L’aggio pregato pure ‘e fà vèncere ‘o Napule
e Higuain ha subbeto fatto gol.
Nu juòrno però…
«Toc! Toc! San Pio, sulo vuje me putite aiutà!»
«Mannaggia a chisto! … Ma he visto che ore sò?
E làssame almeno mangià!
Me staje ncuollo comme a nu diavulo,
me faje mancà ‘o sciato!
E’ vero che io sò Santo
e sto ccà pe vuje,
pe ve servì matina, sera e notte.
Ma io sò vecchiariello, m’aggio ‘a fà nu scampulillo,
doje ore senza penzà a nisciuno.
E tu? Toc! Toc! “San Pio, aggiàte pacienza…
scusate tanto, io avesse…”
E no, agge pacienza tu na vota tanto!
T’aggio sempe servito pronto
comme a nu prevete ncoppo a l’altare,
na vota pe chesto, n’ata vota pe chello,
na vota pe chell’ato,
io mica pozzo stà sempe appriesso a te
cu tanta gente che me chiamma?
Addò m’aggio ’a spàrtere?
Na vota tanto scurciate ‘e braccia
e famme stà nu poco ngrazie ‘e Dio!»
Ave propio ragione Padre Pio, ora San Pio:
cocche vota avimmo ‘a fà sulo nuje
senza l’aiuto dê sante mparaviso.
Tanto ‘o sapimmo: chilli ce guardano sempe.
(Baiano, 11 Maggio 2016)