Tradimento
Ogne scarpa addeventa scarpone.
Ogge è tuccato pure a me!
Io po’ vulesse sapè na cosa ‘a te:
quanno ero bbuono
m’ aje usato matina sera e notte
pe conzervà tutto chello
che po serveva pe te vegnere ‘a panza.
Addò stà ‘o latte?
Dint’ ‘o frigorifero.
Addò stà ‘a carne?
Dint’ ‘o frigorifero.
Addò stanno ‘e patane?
Dint’ ‘o frigorifero.
Po’ è bastato nu pertuso piccerillo
ma proprio uno
piccerillo piccerillo
ca quasi nun se vede
e m’aje levato ‘a tuorno
nu servo cchiù.
Ô posto ‘e mettere n’appilaglio,
m’aje purtato a jettà
comme a nu fierro viecchio
sotto ‘o ponte ‘e l’autostrada
‘mmiezo a tanta schifenzia.
Mo che songo vecchiariello
e nu poco scarcagnato
t’aje scurdato subbeto
tutto bene ca t’aggio dato
e manco ô campusanto[1] m’aje accumpagnato
cu ‘a museca e cu ‘e sciure.
(Baiano, 13 novembre 2024)
[1] Campusanto: isola ecologica