Gaza
Cu ‘a lengua ‘a fora e ‘o core ca esce dô pietto
corre na piccerella câ pignata mmano
penzanno ô frate cu ‘e vracce scapuzzate
mmiezo ê prete dâ casa scarrupata.
Chi sa ‘a quanno nu mangia
e comme fa a sta’ allerta.
Ma ‘e lupe affamate se strafucheno tutto
primma ca essa arriva.
Chiagnenno e preganno senza lacreme
torna arreto cô stommaco vacante.
Manc’ogge si mangia e forse manco dimane.
Sulo ‘a povere s’appoia nfaccia.
«O Dio di Canaan, pecchè avimm’ ‘a fà sta fine
e nisciuno fa niente pe nuje?»
allucca ntramente cade nterra pâ famma.
«Fermate sti mbomme ca chioveno dô cielo
pecchè nu saccio chiù addò aggi’ ‘a scappà
pe purtà ‘a pelle â casa!»
(Baiano, 29 luglio 2025)